CEBU CITY – Gilauman ang kapin 1500 nga mga miembro sa mga nagkadaiyang progresibong grupo ang musugat ni Presidente Rodrigo Duterte ugmang adlaw atol sa kasaulugan sa adlaw sa mga mamumuo.
Matud ni Bayan Muna Central Visayas coordinator John Ruiz nga duna silay ipahigayong lihok protesta sa mga nagkadaiyang dapit sa Sugbo diin ilang ipagawas ang ilang kasagmuyo gumikan sa gikaingong mga wala matuman ni Presidente Rodrigo Duterte.
Ang hisgutanan kabahin sa kontraktwalisasyon nga wala gfyud nahatagan ug pagtagad sa Duterte administration mao ang ilahang sentro sa hisgutanan.
Dugang pa ni Ruiz nga ang lakang sa Presidente nga pagpasa sa kongreso aron sa paghimo ug lakang aron mahunong ang contractualization usa lamang ka paglihay sa iyahang saad ug kung ugaling mulihok man ang kongresso wala gihapoy kasiguraduhan nga ma proteksyunan ang mga empleyado.
Matud pa niini nga dili gyud kalikayan nga dunay mahitabong lobby money ug ang pressure gikan sa mga gamhanan ang mahimo nga maka impluwensya unya sa desisyo sa mga magbabalaud.
Iduso usab nila ang 750 nga minimum wage nga susama sa kauluhan.
Angayan matud pa ni Ruiz nga usahon na lamang ang minimum wage sa nasud ug angayan nga ibasura ang tripartite rule.
