CEBU CITY-Giisip sa mga progresibong grupo nga usa ka kadaugan ang nahimong pagpirma ni Presidente Rodrigo Duterte sa executive order nga maoy nagtapos sa kontraktwalisasyon sa natad sa pagpanrabaho.
Matud ni Mr John Ruiz, ang tigpamaba sa Bayan Central Visayas nga malipay sila sanglit nahimong malampuson ang ilang pagduso nga mahunong na gayud ang kontraktwalisasyon sa nasud ingon man ang ilang pag paabot nga matuman sa presidente ang iyahang saad sa katawhan.
Apan gitino niini nga dili pa sila 100 porsyento nga kumbinsodo niini sanglit ilapang sutaon ang unud sa maong executive order.Suma pa ni Ruiz nga ilang siguraduhon nga ang nalakip sa maong e.o mao gayud ang na estoryahan kaniadto sa mga representante sa mga maumuo ug ni Presidente Duterte.
Samtang gawas sa pagpahunung sa kontraktwalisasyon gipangyo usab nila sa Presidente nga usahon na lang ang minimum nga ipatuman sa tibuok nasud ug dili buak-buakon sama sa nahitabo karon.
Ilang giduso ang 750 pesos nga minimum wage sa tanang trabahante.
