Giawhag sa Philippine Red Cross-Cebu Chapter ang publiko nga mas aktibong moapil sa blood donation, samtang gipasiugda usab niini ang dakong papel sa media sa pagpalapad sa kahibalo bahin sa kamahinungdanon sa pagdonate og dugo.
Matud ni Atty. Maria Vera De Jesus, Administrator sa Philippine Red Cross-Cebu Chapter, dili angayng mabalaka ang mga blood donor tungod kay luwas ang proseso sa pagdonate. Giawhag usab niya ang publiko nga likayan ang negatibong panghunahuna bahin sa blood donation ug ilhon hinuon ang maayong pagbati nga mahatag sa pagtabang sa uban pinaagi sa pagdonate og dugo.
Gipasabot usab sa Red Cross nga dili angayng magduhaduha ang publiko sa pagdonate tungod kay adunay medical assessment una aron masuta kung luwas ug kwalipikado ba ang usa ka indibidwal sa pagdonate.
Samtang, matud ni Dr. Era Tudtud, Blood Bank Manager, importante ang paghatag og saktong impormasyon pinaagi sa media aron mas daghang tawo ang maabot ug maengganyo nga mahimong blood donors.
Pinaagi sa pagdugang sa gidaghanon sa regular blood donors, mas mapalig-on ang blood supply ug masiguro ang padayon nga pagkaanaa niini alang sa mga pasyenteng nanginahanglan, ilabina panahon sa emerhensya.
