Nakurat ang mga kaubanan ug mga higala sa Cebu Alliance for Duterte, sa balita sa pagkamatay ni Philip Engbino, usa ka content creator ug Political vlogger nga nailang taga sunod sa mga Duterte, kini human nga nasayran nga gipusil-patay si Engbino sa sayu sa kabuntagon niadtong Dominggo, Setyembre 4, sa National Highway, Barangay Bacolod, Carrascal, Surigao del Sur.
Gikahinabi sa Bombo Radyo Cebu Newsteam, si Jun Abines, Co-covenor sa Cebu Aliance for Duterte, nga nakurat siya ug ang iyang mga kaubanan sa DDS leaders sa Sugbo, human nila nadawat ang report sa pagtaliwan ni Engbino.
Matud niini, nga nagkigtagbo pa ang biktima sa nakalabay nga semana ngadto sa iyang pamilya diri sa Sugbo, lakip na ang mga kaubanan niini sa mga DDS leaders, apan dakong kakurat nila sa balita hinungdan nga iyang gihulagway si Engbino, nga usa ka maayung tawo, ug mubarog gayud sa iyang politikanhong prinsipyo.
Sigon ni Abines, taliwala sa ilang pagkahigala, wala siya masayud kung unsa gayu’y tinoud nga motibo sa panghitabo, apan iyang gipanghinaot ang halapad nga imbestigasyon sa pagkamatay sa biktima aron matino ang motibo niini.
Gihimug-atan niini, nga dili maayu nga adunay mga kaso sa mga political vloggers ang gipamusil patay, ug gidugang nga dili lang kini usa ka isolated case, busa iyang gihangyo ang mga sakop sa kapulisan nga lilion ang tanang anggulo, aron mahatagan ug hustisya sa biktima.
Base sa mga pasiunang mga report, usa sa mga gilili sa motibo ni Engbino, mao ang pagkalambigit niini sa isyu sa iyang trabaho isip manager sa usa ka Mining Company.
Naila si Philip Engbino isip, political vlogger ug taga sunod sa pamilyang Duterte.
Sapagkutlo ning balita, padayun pa ang imbestigasyon sa mga kapulisan, sa pagtino sa motibo sa pagpamusil niini.
