CEBU CITY – Gikalipay ni Konsehal Jun Gabuya, ang committee chairman sa paugnat sa kusog, ang pagkahimo sa Cebu City nga maoy nag-una sa medal tally sa Philippine National Game nga gipahigayun sa dakbayan sa Sugbo.
Diin nakalangkat na ug 76 ka gold, 64 ka silver ug 56 ka bronze ang mga atleta sa dakbayan.
Gumikan niini, gibutyag ni Gabuya nga ipadayun gayud nila ang sports program nga gipatuman sa dakbayan diin gitrain ang maong mga atleta nga apil sa PNG, sanglit makita man nga epektibo gayud kini sa pagpalambo sa ilang kapasidad sa natad sa sports.
Usa sa nakita nga hinungdan sa pagpangharos sa mga atleta sa dakbayan, mao ang dako nga suporta nga gihatag sa Sports Commission diin pinaagi sa programa nga gitagana sa mga atleta mas nabansay-bansya niini ang ilang talento ingun man ang dedikasyon sa mga player nga mudaog gayud sa maong dako nga sporting event.
