Gilamoy ang lima ka mga balay sa miulbong sunog ug nakadaot sa usa ka balay sa Sitio Nangka Ville, Barangay Quiot, Dakbayan sa Sugbo, niadtong Huwebes sa hapon, Nobyembre 5, nga nakaapekto sa 36 ka mga indibidwal.
Nakatala ang Cebu City Department of Social Welfare and Services (DSWS) og unom ka apektadong balay—lima ang hingpit nga naguba ug usa ang nadaot ug sa ilang katapusang taho. Pito ka pamilya ang nagpuyo niining mga balaya.
Nakadawat ang Cebu City Fire Station sa taho bahin sa sunog sa alas 12:54 sa hapon ug miabot sa lugar paglabay sa lima ka minuto, sa alas 12:59 sa hapon.
Ang sunog miigo sa mga pinuy-anan nga gipuy-an nila ni Jasson Arellano, Andrie “Eboy” Arellano, ug uban pang mga residente.
Gibanabana sa fire station nga mokabat sa P120,000 ang kantidad sa kadaot sa kabtangan.
Hinuon, walay natala nga mga kaswalti, samad, o kamatayon, sumala sa taho sa Bureau of Fire Protection (BFP).
Ang DSWS kasamtangang naglista sa mga biktima sa sunog ug sa mga tawo nga nawad-an og pinuy-anan (internally displaced persons o IDPs) human sa insidente.
Ang beripikasyon ug balidasyon sa mga apektadong pamilya ug indibidwal gikatakda alang sa una ug ikaduhang adlaw human sa sunog.
Naghatag usab ang kagamhanan sa dakbayan og mga init nga pagkaon alang sa mga naapektuhan.
Gisaysay ni Jason Arellano ang nahitabo sa ilang panimalay sa wala pa kini masunog, diin gituohang si alyas Jan-jan ang responsable sa sunog.
Nagsugod ang sunog sa panimalay ni Arellano. Matud pa niya, wala siya sa ilang panimalay sa dihang nahitabo ang insidente kay nagkalot siya sa ilang silingan para sa septic tank.
Nahibaw-an na lamang niya ang sunog human adunay miadto kaniya ug nagpahibalo nga nasunog na ang ilang balay. Pag-abot niya, naugdaw na kini.
Matud pa niya, nisulod si alyas Jan-jan sa ilang balay ug niadtong higayona anaa pa didto ang iyang asawa ug duha ka anak.
Niadtong mga orasa padung mogawas sa ilang panimalay ang iyang asawa aron managkot kay adlawng natawhan karon sa usa sa ilang anak.
Sa dihang mibiya ang iyang asawa, nagpabilin pa sa balay si alyas Jan-jan ug ang duha ka bata nga anak nila Jason.
Apan nanggawas ang mga bata aron magduwa og computer sa silingan, hinungdan nga si alyas Jan-jan na lamang ang nahibilin sa sulod sa balay.
Dugang pa ni Arellano, dali nga midagan si alyas Jan-jan sa dihang nagsugod na ang maonh sunog ug wala kini nanawag og tabang o nagpahibalo nga nasunog ang ilang panimalay.
Sa pagkakaron, gipangita pa si alyas Jan-jan aron makuha ang iyang pahayag ug matino ang nahitabo sa wala pa masunog ang balay nila Arellano.
Naigo ang sunog sa Sitio Nangka Ville, Barangay Quiot Pardo, Cebu City alas 12:00 pasado karong hapona ug giisa ang unang alarma alas 12:56 ug nadeklarar nga fire under control ala 1:17 sa hapon. via Bombo Jemm Mayot
