Nag-inspeksyon ang Bureau of Fire Protection (BFP)-7 ug Cebu City Fire Station sa mga sementeryo sa dakbayan sa Sugbo, isip kabahin sa ilang pagpangandam alang sa umaabot nga kalag-kalag karong Nobyembre 1 ug 2.
Lakip sa ilang susihon ang mga suplay sa kuryente, electrical wiring ug uban pang instalasyon nga posibleng hinungdan sa sunog, aron masiguro ang kaluwasan sa katawhan nga mobisita sa mga sam-ang.
Gilauman nga modagsa ang mga tawo sa mga sementeryo sa maong mga petsa aron sa paghinumdom ug pagbisita sa ilang mga mitaliwan na gihamal sa kinabuhi.
Subay niini, atong paminawon ang atong exclusive interview si SFO3 Wendell Villanueva ang tigpamaba sa Cebu City Fire Station kabahin niini.
Mao kadto ang atong excited interview ni SFO3 VILLANUEVA sa Cebu City Fire Station.
Matud pa ni SFO3 Villanueva ilahang gipalig-on ang pagpangandam aron malikayan ang mga insidente sa sunog karung kalagkalag ug aron masiguro ang kahapsay ug kaluwasan sa publiko.
Usa sa ilang gikabalak-an ang posibleng pagdungan sa daghang tawo sa mga sementeryo samtang adunay mga magdagkot og kandila ug nagbutang og dugang nga suga sa mga pantiyon.
Gipasidan-an nga ang dili hustong pag-instalar sa mga kable ug wiring, ilabina kon dili kini masusi, mahimong hinungdan sa short circuit ug sunog.
Gilauman usab nga magbutang og mga BFP personnel ug fire trucks sa gawas o duol sa mga sam-ang aron dali silang makatubag kon adunay emerhensiya atol sa selebrasyon sa Kalag-kalag.
Samtang, nanawagan si SFO3 Villanueva sa publiko nga mag-amping sa ilang mga panimalay, ilabina kon ang tibuok pamilya mobiya aron mobisita sa sam-ang
Gipahinumdoman niya ang katawhan nga siguruhong mapalong ang mga appliances ug uban pang gamit nga kinahanglan patyon sa dili pa mobiya sa balay.
Gidasig usab ang publiko nga susihon ang mga posibleng tinubdan sa sunog aron malikayan ang mga disgrasya samtang wala ang mga nagpuyo sa panimalay.
