CEBU CITY – Gisuta karon sa mga otoridad ang motibo ug identidad sa mga suspek nga nipusil patay sa usa ka high value target ug Filipino-Chinese national sa Barangay Poblacion, lungsod sa Cordova, probinsya sa Sugbo.
Giila ang biktima nga si Gary Ong Go, 57 anyos, usa ka negosyante ug temporaryo nga nanimuyo sa nahisgutang dapit.
Matud ni Police Senior Inspector Janus Gi-angan, ang hepe sa Cordova PS nga padulong na unta sakay ang biktima sa sakyanan niini sa dihang kalit lang nga miabot ang usa ka van ug kalit nga gipusil ang biktima sa makadaghan nga higayun.
Nakaangkon ug samad pinusilan ang biktima sa nagkadaiyang parte sa lawas, rason sa hinanali nga kamatayun niini.
Una na matud pa nga nasikop si Go sa usa ka buybust operation sa Quezon City niadtong Hunyo 2015 human usab kini makuhaan ug 45 ka kilo nga iligal nga drogas.
Nasayran usab nga lakip ang pangalan ni Go sa drugwatchlist sa kapulisan. Gani, usa kini ka kanhi manager sa usa ka dako nga kompanya ug karon usa na ka kontrator sa Fabcon nga anaa gitukod sa Mactan Newtown.
Samtang, gitataw ni Eva Borromeo, ang inahan sa ka-live-in partner ni Go, nga kinauwahian nga hearing na unta karon sa gi-atubang nga kaso nga adunay kalambigitan sa iligal nga drogas, sa biktima sa Quezon City.
