Gihingusgan sa Lapu-Lapu City Police Office (LCPO), ubos sa pagpangulo ni Police Colonel Agosto Daskeo, City Director, ang usa ka aktibo ug hiniusang pamaagi alang sa kaluwasan sa mga eskwelahan pinaagi sa S.A.F.E.R. Schools o Standardized Awareness and Framework for Education and Readiness through School Safety Orientation.
Ang S.A.F.E.R. Schools usa ka inisyatiba sa city director nga gihimo isip tubag sa nagkadaiyang mga isyu sa kaluwasan ug seguridad nga giatubang sa mga eskwelahan, ingon man sa panginahanglan alang sa mas organisado ug koordinadong pamaagi sa pagpanalipod sa mga estudyante.
Sukad sa pagconceptualize niini, mas napalig-on pa ang programa pinaagi sa aktibong partisipasyon ug inisyatiba sa Department of Education (DepEd) Lapu-Lapu City Division.
Aktibong nakigtambayayong ang DepEd sa LCPO sa pag-ila sa mga isyu may kalabotan sa school safety, paghatag og mga sugyot gikan sa sektor sa edukasyon, ug pagpalambo sa mga lakang nga haum sa tinuod nga panginahanglan ug kahimtang sa mga eskwelahan.
Gidesenyo ang S.A.F.E.R. Schools alang sa mga school head, magtutudlo, estudyante, ginikanan, security personnel, ug uban pang stakeholders.
Pinaagi sa hiniusang paningkamot sa LCPO, DepEd Lapu-Lapu City, ug sa tibuok school community, tumong sa S.A.F.E.R. Schools nga mapalambo ang kaaandam sa mga eskwelahan ug makamugna og mas luwas nga palibot diin ang matag estudyante makakat-on ug molambo.
