Gitangtang sa trabaho ang usa ka traffic enforcer gikan sa Traffic Enforcement Agency of Mandaue (TEAM) human mikatag sa social media ang video nga nagpakita kaniya nga hubog ug nakig-atubang sa usa ka estudyante samtang wala siya sa oras sa trabaho.
Gikanayon sa pangu sa TEAM nga si Hyll Retuya nga ang kawani nga giila nga si Reydan Ouano mi-isyu og citation ticket ngadto sa usa ka driver bisan pa man nga wala siya sa oras sa trabaho niadtong gabii sa Sabado, Setyembre 26.
Matod ni Retuya, giingong gigamit ug gipasigarbo usab ni Ouano ang iyang apelyido nga “Ouano” samtang nakig-atubang sa driver atol sa insidente sa Barangay Opao. Dugang ni Retuya, miangkon si Ouano nga nakainom siya og ilimnong makahubog sa dihang gi-isyu niya ang citation ticket ug gikuha ang driver’s license sa driver.
Gibutyag usab ni Retuya nga nagsugod ang insidente human giingong gi-overtake-an sa driver si Ouano, hinungdan nga giduol ug gipahunong niya kini.
Subay niini, gihimug-atan ni Retuya nga gidid-an ang mga kawani sa TEAM sa pagpatuman sa mga balaod sa trapiko kung wala sila sa oras sa trabaho. Dili usab sila angay magdala og mga citation ticket ug radyo gawas sa ilang opisyal nga mga katungdanan. Busa, subling gipasiugda ni Retuya nga ang ahensya nagpatuman og “zero-tolerance policy” batok sa korapsyon ug pag-abuso sa awtoridad sa ilang mga kawani.
