CEBU CITY – Nahimung usa ka bati nga damgo ang unta malipayun nga handumanan sa mga managhigala human ang ilahang outing sa Batong Malunhaw Beach Resort sa Barangay Madridejos, lungsod sa Alegria, probinsya sa Sugbo.
Sa pakighinabi sa Bombo radyo kang PO2 Melvin Batoc sa Alegria Police Station, gibutyag niini nga gikan sa outing ang 14 ka mga managhigala sa dihang nag-abang kini ug usa ka bangka arun nga muhatud kanila pa-uli apan gumikan sa makusug nga balud hayan mitikya-ub ang ilahang gisakyan nga bangka.
Matud ni Batoc nga nakalangoy pa ang 11 kanila ug naluwas ang kaugalingon.
Apan sa dihang gidala sa ospital, gideklarar gayud nga patay ang tulo kanila nga giilang sila si Rosalyn Desiree Peligro, 31, Ruby Desiree Peligro, 27, ug Albert Lopez, 24 ug pulus mga residente sa Barangay Filomena, sa nahisgutang lungsod.
Nasayran nga walay gisu-ut nga life jacket ang mga biktima.
Sa pagkakarun, natanggong na sa Alegria Police Station ang drayber sa bangka nga si Jandel Bindolo ug gipaabut na lang ang kaso nga ipasaka batuk niini.
