Usa ka 13-anyos nga batang lalaki ang namatay human nabangga sa sakyanan nga gimaneho sa usa ka 14-anyos sa Barangay Aliguay, Maribojoc, Bohol, niadtong Sabado, Oktubre 31, mga alas 8:30 sa buntag.
Base sa imbestigasyon sa kapulisan, ang biktima padulong unta mokaon og pamahaw dihang nabangga kini sa usa ka Kia Bongo nga gikan sa lungsod sa Antequera ug padulong unta sa Tagbilaran City.
Ang 14-anyos nga drayber, nga residente sa Barangay Dampas, Tagbilaran City, gituohang nakatulog samtang nagmaneho, hinungdan nga nabangga ang sakyanan ngadto sa bata nga nagtabok sa dalan.
Tungod sa kakusog sa impact, ang biktima nalabay ngadto sa semento nga karsada. Ang sakyanan nagpadayon sa pagdagan hangtod nga nabangga kini sa koral sa usa ka balay ug naigo ang duha ka motorsiklo nga nakaparada.
Gidali pagdala sa mga personahe sa Maribojoc Emergency Response Unit ang biktima ngadto sa Maribojoc Community Hospital, diin gideklarar siya nga patay na pag-abot sa ospital.
Ang batan-ong drayber gidala ngadto sa Maribojoc Municipal Police Station ug sa ulahi gitugyan ngadto sa Women and Children Protection Desk alang sa tukmang aksyon o interbensyon.
