CEBU CITY – Patay ang 7 anyos nga bata human kini mahagbong ug mapasok sa 6 wheeler truck nga iyang gikapyotan sa may S Osmena T Padilla Ext. Tejero St. Cebu City. Giila ang namatay nga si Juius Benitez, nagpiyo sa Brgy. San Roque niining dakbayan.
Basi sa imbestigasyon, giingon ni PSI Jomar Pomarejos ang hepe sa Waterfront PS nga ang 7 anyos nga bata mikapyot sa may likod nga bahin usa ka 6 wheeler truck nga gikargahan og mga constrcution material. Wala matud pa makabantay ang driver sanglit habog man ang truck.
Matud pa nga muhinunong ang truck sanglit red naman ang traffic light apan sa dihang ‘GO’ na ang signal, nahagbong ang bata human nga milarga ang truck. Apan napasok kini sa ilawom ug naligsan nga maoy hinungdan sa iyang kamatayon.
Nanayagit matud pa ang mga pedestrian nga adunay bata nga napasok sa truck mao nga nakabantay ang driver.
Natanggong karon sa waterfront police station ang driver nga si BEto Hubertson Baste, 41 anyos ug residente sa Brgy. Guadalupe dakbayan sa Sugbo samtang gipaabot ang kabanay sa biktima.
Nasayran nga ang namatay nga bata ilo na ug naa kini sa puder sa iyang iyaan.
Dugang pa usab sa hepe nga mao kini ang ilang tan-awon karon sanglit duna na usab sila nadawat nga report nga sa maong lugar dunay mga estudyante nga mukalit lang matud pa ug pangapyot sa mga manglabay nga truck.
