CEBU CITY -Miresulta sa kamatayon sa usa ka 4 anyos nga batang lalaki ang gipahigayun nga anti-drug operation sa mga pulis sa Carbon Police Station sa Barangay Ermita, dakbayan sa Sugbo.
Giila ang biktima nga si Bladen Sklyer Abatayo nga nakaangkun ug samad pinusilan sa iyahang dughan sa nahitabung pagpamusil tali sa mga pulis ug mga subject sa nahisgutang operasyon.
Naabtan sa mga pulis sa gitu-uhang drugden ang lima ka mga kalalakin-an nga nag-repack ug mga iligal nga drugas samtang ang uban ang nanuyup.
Matud pa ni Police Sr/Insp John Kareen Escober, ang hepe sa Carbon Police Station, nga mibunut ug armas ang usa sa mga suspek ug dayung pabutu ug mi-ambak sa luyu sa nahisgutang panimalay ug wala na nila kini makit-an.
Sigon pa nga nakuratan na lang si Escober sa dihang nakabalita nga adunay usa ka bata nga na-igu sa maong pagpabutu sa armas.
Dali nga gidagan sa mga pulis ang bata sa tambalanan apan gideklarar na kining dead on arrival.
Sa pagkakarun, nagpadayun ang pagkuha ug impormasyon sa mga pulis kung si kinsa ang nanag-iya sa nahisgutang panimalay nga gitu-uhang drug den ug pagtumbuk sa lima ka mga lalaki nga responsabli sa maong insidente.
