Cebu City- (UPDATE)-Gitino ni Police Chief Supt Debold Sinas nga dili ambush ang nahitabo sa sakyanan ni kanhi Brgy Tejero Kapitan Jessielou Cadungog diin ang gistudlong suspek niini usa ka pulis. Matud ni PCSUPT Sinas nga nagpahigayon ug surveilance ang napusilan patay nga si PO3 Eugene Calumba gumikan sa report sa illegal drugs sa Brgy Tejero . Gisaysay sa regional director nga ang kampo ni Cadungog maoy una nga mipusil kang PO3 Calumba ug sa driver sa motor nga gisakyan niini nga si Michael Banwa. Si Calumba ang kasamtangan nga miembro sa Drug Eforcement Unit sa Pari-an Police Station.
Samtang gibutyag usab ni Sinas nga posible mag atubang ug kaso si Cebu City Councilor Dave Tumulak gumikan sa pagpanghilabot niini sa gamit ni Banua human kini ang iyahang gidala sa tambalanan. Matud pa nga gikulata pa ni Tumulak si Banua samtang didto sa tambalanan. Subay niini gipanawagan ni Sinas si Konsehal Tumulak nga mubisita sa iyang buhatan aron makuha usab ang iyahang habig.
Nasayran nga ganihang buntag, gituohang gibanhigan ang sakyanan ni Cadungog ug napusilan ang gitudlong gunman nga usa ka sakop sa PNP. Gusto usab ni Konsehal Cadungog nga ang NBI maoy mu investigate sa iyahang kaso apan gidala sa CIDG ang driver sa motor nga si Banwa.
