CEBU CITY – Gikalipay sa Cebu City Jail Warden nga si JSupt. Renante Rubio nga walay nakuha nga shabu sulod sa city jail atol sa simultaneous greyhound inspection nga ‘Oplan Linis Piitan’ kaganinang buntag.
Matud ni Rubio nga posibleng mihinay na ang negosasyon sa drogas sulod sa Cebu City Jail ilabina na sa drug offenders buidling mao nga wala na silay nakuha nga shabu. Matud niini nga epektibo matud pa ang kampanya sa iligal nga drogas nunot na usab sa ilang regular greyhound operation.
Apan gitino usab sa Jail Warden nga bisag walay nakuha nga shabu dili gihapon sila mukumpyansa basin og duna pay nakatago ug wala makuha hayan gisiguro niini nga dili sila muundang ug padayon gihapon ang regular nga inspeksyon sa Cebu City Jail.
Gipahugtan sa gihapon nila karon ang seguridad sa naasoy nga bilanggoan tungod kay duna pa gihapon silay nasikop nga mga dalaw nga nagdala og mga kontrabandi ug ipasok ra niini sa kinatawo o sa sampot.
Sagad sa mga nakuhang kontrabando mao ang mga drug paraphernalia sama sa lighters, pisi nga gamit sa mga inmate sa ilang “fishing” technique, ug mga kutsara’t tinidor.
Gipasalig usab ni Rubio nga generally peaceful pa gihapon ang Cebu City Jail ug walay angayang ikahadlok tungod kay micooperate ug mitabang kanila ang PNP at ang PDEA.
