CEBU CITY- Hangyo karon sa usa sa mga topnotcher sa Pharmacist Licensure Examination,nga usbon na ang tan-aw kun ‘stigma’ sa mga pharmacist nga sila maninda lang og tambal.
Kini ang nahimong pamahayag sa nakakuha sa top 8th rank sa naasoy nga exam nga si Danixzle Sevilleno Cutamora, 21-anyos, ug graduate sa University of San Carlos sa Cebu City.
Sa pakighinabi sa Bombo Radyo Cebu kang Cutamora, nagkanayon kini nga usa sa iyang mga inspirasyon mao ang iyang ginikanan ilabina ang iyang inahan tungod kay mao kini ang nag-awhag kaniya nga mukuha og BS Pharmacy.
Wala gi-aluman ni Cutamora nga malakip siya sa Top 8th sanglit kini ang una nga higayon nga mitake siya sa exam ug wala usab siyay mga latin honors sa dihang nageskwela pa siya hangtud nga nakahuman hayan dako ang iyang pasalamat sa mga misuporta sa kanya.
Human niini mapasar ang exam, plano sa Pharmacy graduate nga sudlon ang natad sa Research ug manimpad para sa bago nga oportunidad isip pharmacist.
Samtang tambag ni Cutamora sa mga wala pa nakapasar nga tas-an ang ilang pangandoy ug ubanan og hugot nga pag-ampo ug para usab sa kauban niyang nakapasar, angayan tarungon matud pa niini ang ilang napili nga propesyon.
