Nag-andam na ang Cebu Port Authority o CPA sa pagpalig-on sa seguridad sa tanang pantalan sa Sugbo tungod sa gilaomang pagdagsa sa mga pasahero atol sa Kalag-kalag o All Saints’ Day ug All Souls’ Day.
Pinaagi sa “Oplan Biyaheng Ayos: Undas 2026,” magpatuman ang CPA og dugang nga mga lakang sa seguridad ug pagdumala sa operasyon gikan Oktubre 29 hangtod Nobyembre 3, 2026.
Sumala ni Marvin Sigaton, ang CPA Security Division Port Police Inspector, ibutang sa heightened alert status ang seguridad sa mga pantalan atol sa maong panahon, nga mas taas sa naandang Security Level 1 apan dili mosaka sa Security Level 2.
Gipasabot ni Sigaton nga base sa pinakabag-ong travel security alert advisory nga gipagawas sa Office of Transportation Security, walay gi-report nga armed threat sulod sa rehiyon sa Kabisay-an.
Bisan pa niini, gipalig-on sa CPA ang ilang mga lakang aron masiguro ang kaluwasan sa mga pasahero ug mapadayon ang hapsay nga operasyon sa mga pantalan.
Matod ni Sigaton, palugwayan ang oras sa duty sa pipila ka security personnel aron mag-overlap ang ilang mga shift ug masiguro nga adunay igong presensya sa mga personahe sa mga lugar nga gikinahanglan og dugang nga pagbantay.
Aduna usab silay planong random inspection sa mga pantalan nga giila nga “busy” aron masusi ang kahimtang sa seguridad ug matino ang mga dugang nga lakang nga angay ipatuman sa panahon sa Oplan.
Gibutyag ni Sigaton nga adunay kapin 300 ka security guards nga gitudlo sa tibuok pantalan sa Sugbo, dugang sa kapin 40 ka personnel sa tactical operations unit.
Aduna usab silay 28 ka K9 units nga gibansay sa pag-ila sa eksplosibo ug ilegal nga droga, ingon man tulo ka patrol boats nga gigamit sa ilang seaborne patrol operations.
Dugang sa heightened security alert, hugot usab nga ipatuman ang “No Ticket, No ID, No Entry” policy. Ang mga pasahero kinahanglan adunay balidong tiket ug identification card ug gidasig nga moabot sa pantalan labing menos duha ka oras sa dili pa ang ilang iskedyul sa pagbiyahe.
Giawhag usab ang publiko nga mopalit lamang og tiket pinaagi sa awtorisadong ticketing offices o opisyal nga online booking platforms aron malikayan ang pagpangilad sa mga ticket scalper ug ang sobra nga pagpabayad.
Magbutang usab og “Malasakit Help Desks” ug first-aid stations sa matag terminal aron motabang sa mga pasahero ug motubag sa posibleng mga emerhensiya atol sa travel period.
Sakop sa ilang pagmonitor ang siyam ka Port Management Offices o PMOs sa Sugbo, nga matag usa adunay daghang pantalan, lakip ang mga pantalan sa mga isla ug ubang lungsod sa lalawigan.
Samtang, base sa datos nga gipaambit ni Sigaton, mikabat sa mga 4.6 milyones ang inbound ug outbound passengers sa tanang pantalan sa Sugbo sa unang quarter pa lamang niining tuiga. Sa Cebu Base Port, mikabat sa 2.5 milyones ang mga pasaherong gidumala sulod sa samang tulo ka bulan.
Alang sa Kalag-kalag karong tuiga, gilauman sa CPA nga molapas sa 200,000 ang ihap sa mga pasahero sa tanang pantalan sa Sugbo, kon itandi sa kapin 113,000 ka pasahero nga natala atol sa Undas niadtong 2025.
