CEBU CITY– Gidumog sa mga tawo ang usa ka kahoy sa Mahogany sa daplin sa dan sa may Punta Engaño syudad sa Lapu-Lapu, Cebu gumikan matod pa nga naporma nga imahe sa birhen sa panit sa kahoy.
Matod ni Mary Ginon, 40- anyos ug residente sa nahisguta’ng dapit nga niadto’ng niaging Dominggo nakita niya ang nahisgutang imahin apan gamay pa lang kini hangtud nga nidako na kini karo’ng adlawa.
Gisaysay pa niya nga sa nakalabay nga Lunes sa gabii nadamgohan niya nga nagpakita ang birhen sa Simala, ang giila nga milagrosong birhen sa probinsya sa Cebu nga gidumog usab sa daghang mga deboto.
Nagkanayon matod pa ang birhen kang Ginon nga butangan og altar ang naasoy nga lugar kung diin adunay napormang imahen.
Tungod niini gibutangan ni Ginon og puting tela ug mga buwak isip paghalad na usab sa mao’ng altar.
Samtang managlahi usab ang interpretasyon ug pagtuo sa mga tawo kabahin niini apan ang importante matod pa ang respeto sa matag usa sa ilang pagtuo kung unsa man ang mensahe niini.
Nasayran nga nangandam na ang mga residente sa Opon, syudad sa Lapu-Lapu sa umaabot nga kapyistahan sa birhen sa Regla nga giila usab nga gidumog sa daghang mga deboto lukop nasod.
