CEBU CITY – Padayun karun ang monitoring sa Cebu Provincial Police Office kang Daanbantayan Mayor Vicente Loot human nga giingung wala na kini mu report sa iyahang opisina.
Sa pakighinabi sa Bombo Radyo kang CPPO Director Police Sr/Supt Manuel Abrugena, gibutyag niini nga gi-monitor nila ang lihuk sa mayor kinsang wala na magpakita sa iyahang opisina gumikan sa seguridad niini.
Matud ni Abrugena nga una nang gitangtangan ug police escort ang mayor ug wala na usab kini gahum sa kapulisan sa Daanbantayan.
Giangkun usab sa director nga nag-request si Loot ug police escort apan gipadayag ni PRO 7 Regional Director C/Supt Debold Sinas nga ang Kampo Crame na ang mu desisyun sa hangyu sa mayor.
Samtang, giklaru ni Cebu Provincial Board Member Sun Shimura nga wala na una magpakita ang iyahang ama-ama nga si Mayor Loot alang sa iyahang seguridad, pamilya ug mga konstituwente.
Apan giklaru sa Bokal nga nagpadayun sa iyahang trabaho ang mayor ug mipirma pa kini ug mga impurtanti nga mga dokumento.
Nasayran nga hilabihan nga naapektuhan si Mayor Loot ug ang pamilya niini sa pamahayag ni Presidente Rodrigo Duterte nga nalambigit sa iligal nga drugas ang mayor.
