Cebu City-– (Update) Mikabat na sa 29 ang ihap sa mga nangamatay sa nahitabong landslide sa Tinaan Naga City Cebu.
Base sa lista sa Naga City Command Center, 8 ang samdan samtang 897 ka mga pamilya kon kapin 2 mil ka mga indibidwal ang anaa sa evacuation center.
Mibisita usab sa area si DSWD Sectretary Virginia Orogo. Matud ni Orogo nga nakapagawas na ug 2 million pesos ang DSWD alang sa mga nabiktima sa landslide ug alang sa hinabang nga iahatag sa mga namatyan.
Mipahimangno usab kini sa mga residente nga mutuman sa mga mando sa lokal nga opisyal kabahin sa pag pabakwit kanila aron malikay sila sa peligro.
Samtang nahimong emosyunal si Naga City Mayor Christine Chong human gibalikan ang mga lakang nga gihimo sa city government aron unta malayo sa peleigro ang mga residente sa Brgy Tinaan Naga City Cebu.
Matud ni Mayor Chong nga wala niini gitudlo ang Mines And Geo Sciences Bureau nga maoy sad-an apan matud sa mayor nga nangayo sila og technical assistance gikan sa maong buhatan aron makahimo sila ug lakang alang sa ilang mga residente.
Giangkon sa Mayor nga gilibkas niini ang Cease and desist order niadtong Setyembre 6 nga iyahang giluwatan human migawas sa assessment sa MGB nga walay angay nga kabalak-an ang mga residente.
Apan dili kumbinsido niini ang mayor maong matud pa nga hugot gihapon niini nga gidid-an ang Apol Land Quary Corporation nga dili usa magpahigayon ug quarry activity sa lugar ug ipahikllin usa ang mga apektadong residente sa sitio Tagaytay.
Gipahiklin man hinuon ang mga pamilya apan wala mahurot ug mitumaw ang landslide nga nakaapekto usab sa laing sityo.
Sa pagkakaron , matud sa mayor nga focus na lamang usa sila sa search and rescue operation ug isunud na lamang ang imbestigasyon aron mahibaw an kun kinsa gyud ang dunay tulubagon sa insidente.
