Cebu City-Mukabat na sa 18 ang patay gumikan sa sakit nga Dengue sa probinsya sa Bohol. Base sa tala sa Department of Health Region 7 , gikan sa buwan sa Enero hangtud Oktubre 27 ning tuiga, aduna nay 1,491 ka mga natalang kaso sa maong sakit.
Matud ni Dr Shelbay Blanco ang medical health officer III sa DOH-7 nga kasagaran nga mabiktima sa maong sakit mao ang mga bata nga naa sa age group nga 6-10 anyos ang edad.
Giangkon niini nga duna gayud pagtaas sa kaso sa dengue sa Bohol, apan dili pa maingon nga igo na kining basehan aron sa pag deklarar sa outbreak.
Nagpabilin matud pa gihapon nga taas ang kaso niini sa Cebu City ,kung itandi sa ubang lugar dinhi sa Central Visayas.
Padayon usab matud pa ang ilang pakig-alayon sa mga local government units nga adunay taas nga kaso sa dengue.
Subay niini gi-awhag ni Dr. Blanco ang katawhan nga kanunayon ang paglimpyo sa palibot ug pagsiguro nga walay maitlugan ang lamok.
Gihimug-atan niini nga dili lamang tungud sa pahaon sa ting-uwan musaka ang kaso sa dengue gumikan kay maisip kini nga endemic na daan sa atong lugar.
