Cebu City- Patay ang usa ka tanod human kini gipusil sa wala mailhing mamumuno sa Brgy San Roque Quimba, syudad sa Talisay .
Ang biktima mao si Lindee Belila, usa ka barangay tanod sa Brgy Tangke.
Matud ni Police Supt Marlu Conag, ang hepe sa Talisay City PNP, nga base sa ilang inisyal nga imbestigasyon, sakay sa iyang motorisiklo ang biktima ug padulong unta sa Brgy Tangke sa dihang gipusil kini sa mga suspek. Daghang mga samad pinusilan ang naangkon niini nga miresulta sa iyahang kamatayon.
Matud pa ni Conag nga walay nakakita gayud sa pagpamusil apan dunay nakabantay nga sa puti nga van nga maoy gituohan nga gisakyan sa mga suspek. Usa sa mga gitanaw nga anngulo sa kapulisan ang posibleng pagbaton ug kontra sa biktima.
Matud ni Supt Conag nga adunay mga impormasyon nga gihatag sa kapulisan si Belila nga miresulta sa malapuson nga operasyon sa kapulisan .
Nakabantay usab si Conag nga sa matag anha sa biktima sa police station, magtabon kini sa iyahang nawong. Kanunay usab kini nga musuot og bonnet.
Nakuha sa crime scene ang mga kabhang sa 9mm nga armas.
Sutaon pa sa kapulisan kung asa gikan ang biktima sa wala pa mahitabo ang krimen.
