Cebu City-Laing konsehal na usab sa lungsod sa San Fernando ang gipusil patay didto sa Zamboangga del Sur.
Ang biktima mao si konsehal Alfonso Donaire IV kinsang subli unta nga magpapili karong Mayo 2019 nga piniliay sa mao gihapon nga posisyon.
Gikumpirmar sa Zamboangga del Sur Provincial Police Office nga gipatay ang biktima sa lungsod sa Ramon Magsaysay probinsya sa Zamboangga Del Sur.
Nagdumili na sa paghatag og dugang detalye ang pulis nga nahinabi sa Bombo Radyo gumikan sa ilang protocol sa pag pagawas og detalye sa media.
Si Konsehal Donaire ang taud-taud na nga wala mireport sa munisipyo sa San Fernando human sa sunud -sunud nga pagpatay sa mga opisyal sa ilang lungsod.
Nasayran nga nalambigit usab ang pangalan niini sa iligal nga drugas gumikan sa matud pa koneksyon niini sa self confessed drug lord nga si Franz Sabalones.
Si Donaire ang ika lima nga opisyal sa San Fernando nga gipatay sa wala mailhing mamumuno .
Sa milabayng buwan, gibanhigan ang sakyanan ni San Fernando Mayor Neneth Reluya nga gikamatay sa bana niini nga si ABC President Ricardo Nonoy Reluya ug laing duha ka mga staff niini. Gipatay usab sa susamang buwan si incumbent Councilor Reneboy Dacalos ug Brgy Magsico Kapitan Jhony Ariesgado.
Niadtong Marso sa miaging tuig, gipatay usab si konsehal Alexander Alicaway.
