CEBU CITY – Gikasagmuyo sa grupo nga KARAPATAN – Central Visayas ang simultaneous police operations sa Police Regional Office-7 sa Negros Oriental diin miresulta kini sa pagkamatay sa 14 ka mga subject.
Matud sa Chairperson sa KARAPATAN nga si Dr. Phoebe Sanchez nga dili makatarunganon ang diretso nga pagpatay sa mga subject ug iyang nakita nga inandaman ang search warrant operations.
Dugang pa ni Sanchez, kinsa nga nagtudlo sa University of the Philippines – Cebu, hugaw ang gibuhat sa mga sakop sa PRO-7 tungod kay, matud pa, nagbuhat-buhat sila og mga consent sa maong operasyon.
Nakadawat usab og mensahe si Sanchez gikan sa pamilya sa mga subject diin, matud pa, planted ang mga armas.
Samtang, wala usab masabtan ni Dr. Sanchez ang pasangil sa PRO-7 nga giingong supporters sa New People’s Army (NPA) ang 14 ka mga patay nga nagagikan sa Canlaon City, Sta. Catalina, ug Manjuyod, sa Negros Oriental niadtong Marso 30.
Misugyot na lang si Sanchez nga mas maayo pang gidala sa korte ang maong pasangil aron mapamatud-an kung sakop ba sila sa NPA o dili.
Gikwestyon usab ni Sanchez ang pagkamakagagahum sa mga kapulisan ilabi na sa pasangil nga misukol ang mga biktima
Samtang, mipahigayon og rally ang Karapatan Central Visayas diin nagmartsa sila gikan sa Fuente Osmeña padulong sa headquarters sa PRO-7 sa Osmeña Blvd, Cebu City.
Gawas sa ilang pag-ampo ngadto sa 14 ka mga patay sa simultaneous police operations, ilang gipasigaan ang mga kandila ug ilang gihigot ang 14 ka mga itom nga ribbon ngadto sa barrier sa PRO-7 headquarters isip timaan sa ilang pagbangutan.
Miangkon si Dr. Sanchez nga gikulbaan sila sa maong rally sa pamasin nga mausob kadtong nahitabo niadtong EDSA 1 Revolution Anniversary. Gibutyag usab ni Sanchez nga kung magpatukar pag-usab ang mga sakop sa PRO-7 og susama nga kanta, iyang gitambagan ang mga kauban nga mo-atras na lang.
Kahinumduman nga giingong giguba sa Karapatan ang metal barrier sa gate sa PRO-7 human sila gipatukaran og kanta sa inila nga Japanese Anime series.
Sa laing bahin, giangkon usab sa Karapatan Chairperson nga nakugang siya, nabalaka, ug naglagot sa pagpamakak sa mga sakop sa PRO-7 ilabi na sa mga pasangil nga misukol ang mga subject sa search warrant operation.
Gihulagway usab ni Sanchez nga nahimong mga terorista ang kapulisan ug kasundaluhan sa maong panghitabo ug nagpangutana na lang kung unsa na lang ang mahitabo sa kaugmaon sa komunidad kung magpasagad ang mga “men in uniform”.
Moabot usab sa 12 ang nasikop sa search warrant sa Negros Oriental ug kasamtangan pang gi-validate sa kapulisan ang impormasyon mahitungod sa giingong pagsuporta sa NPA.
Nanghinaut usab si Sanchez nga paminawon sa mga kapulisan ang ilang pagbangutan.
Tabangan sa Karapatan – Central Visayas ang pamilya sa mga namatay nga subject pinaagi sa ilang relief and rehabilitation operations. Mo-abag usab og tabang ang mga counterpart nga international organizations ngadto sa mga nabiyaan.
