CEBU CITY – Ginoo ug pamilya ang nahimong inspirasyon ni Engr. Ronnie Tanilon Tariga II kinsang gradwado sa University of Cebu ug naghari sa 2019 Civil Engineering Examination.
Matud ni Tariga, atol sa exclusive interview sa Bombo Radyo Cebu nga gusto niya nga ibawos ang kalampusan nga iyang nakuha ngadto sa mga ginikanan niini tungod sa ilang pag-antos. Iya usab nga gihalad ang tanan alang sa mga nagmahal kaniya.
Nahimong topnotcher si Tariga sa maong examination human kini nakakuha og 95.20 nga rating.
Gi-angkon ni Tariga nga wala niya damha nga ma-topnotcher sa board exam sanglit igo lang siya nga nag-ampo aron makapasar.
Gikalipay usab niya og dako ang maong kalampusan ilabi na nga dili lalim ang iyang naagi-an.
Plano karon ni Tariga mao ang magtudlo tungod kay gusto niya nga ipaambit sa mga kabatan-onan ang iyang nakat-onan.
Mensahe usab niini sa wala makapasar karong tuiga, nga dili lang mawad-an sa paglaum sangkit nagtoo siya nga dili pa kini nila panahon karon ug dunay mas maayong plano ang Ginoo para kanila.
Samtang laing 3 ka mga Cebuano ang nakasulod sa Top 10 sa 2019 Civil Engineering Licensure Examination human nga ma-release sa Professional Regulations Commission (PRC) ang resulta.
Anaa sa ika-3 si Reymart Arcenal Refil sa Cebu Institute of Technology University (94.15), ika-9 si Rod Jayson Sanchez Badayos gikan sa University of San Jose Recoletos (92.30), ug Jobert Sumalinog Dela Cruz sa University of Cebu (92.15).
Base sa datos sa PRC, nga 3,372 ang nakapasar gikan sa gikan sa 8,855 nga nag-take sa exam. (FDP/GN)
