CEBU CITY — Dili pa angayang i-legislate ang pagpatuman sa 14th month pay alang sa mga empleyado apan mahimo kining i-awhag ngadto sa mga nanag-iya og patigayon.
Kini ang gipadayag sa negosyante ug kasamtangang Provincial Board Member sa Sugbo nga si Glenn Soco mahitungod sa balaudnong giduso ni Senate Pres. Tito Sotto diin gi-require ang mga employer nga mohatag og 14th month pay alang sa mga trabahante.
Gihimug-atan sa maong opisyal nga dako ang bulto sa mga small and medium enterprises (SMEs) maong pipila ang dili maka-afford niini.
Matud sa maong opisyal nga himoon na lang nga opsyonal ang maong lakang alang sa mga employers basta ang importante nga makahatag kini og maayong sweldo nga mas taas pa sa minimum wage ngadto sa mga empleyado.
Aron matuman ang tinguha sa maong senador, misugyot si Soco nga magpahigayon una og mga public consultation ngadto sa business sectors.
