CEBU CITY — Nahimong katingalahan sa mga residente sa Barangay Boloc-Boloc, lungsod sa Barili, ang kamatayon sa mga kanding diin, matud pa, gibalbal kini.
Unang nabantayan sa mga lumulupyo nga namatay ang unom ka mga kanding sa maong lugar ug wala nila matino kung gipaak ba kini og gibalbal tungod sa mga samad nga naangkon niini.
Matud sa usa sa mga residente nga si Geramae Bitero nga first time kini nahitabo ug nasinati usab sa uban pang mga silingan ang kapalaran sa mga kanding.
Napaglantawan ni Bitero nga posibleng gitripingan sa mga wala matinong tawo ang nahisgutang mga kanding.
Hangtud karon wala pa matino kung kinsa man ang responsable sa padunggab sa mga kanding sa maong lugar.
Aron dili masayang ang mga kanding, giihaw na lang kini sa mga tagbalay ug gipang-apudapud sa mga silingan.
