CEBU CITY — Gibana-banang mokabat ngadto sa dul-an P5-million nga balor sa ginadiling drugas ang nasakmit sa kapulisan atol sa manglahing mga buybust operation sa Metro Cebu.
Natanggong sa prisuhan ang dinakpan nga si Rommel Llatona, 23-anyos, ug taga-Brgy. Pahina Central, Cebu City human nakuhaan og kapin P2-milyones nga balor sa shabu sa usa ka operation sa Brgy. Tingub, Mandaue City.
Narekober sa mga sakop sa City Intelligence Brance (CIB) sa Mandaue City, nga gipanguluhan ni Police Major Regino Maramag, ang 300 grams sa shabu gikan sa nahisgutang dinakpan
Anaa ang dinakpan sa Mandaue City Police Office ug mag-atubang og kasong kalapasan sa Comprehensive Dangerous Drugs Act.
Samtang gi-turnover ngadto sa Pari-an Police Station ang dul-an P2.7 milyones pesos nga balor sa shabu gikan sa usa ka street sweeper.
Kini human nga nakit-an sa maong street sweeper ang 16 ka medium-sized nga pakete sa gidudahang shabu sa kadalanan sa may Zapatera Elementary School diin aduna kini gibug-aton nga 400 gramos.
Sa kasamtangan padayon pang gisuta karon sa kapulisan kung kinsa ang tag-iya sa gidudahang drugas.
Pagtuo pa sa hepe sa nahisgutang presinto nga si PCapt Armando Labora nga possibling dunay nahitabong transaksyon sa dapit ug gibilin lang sa supplier ang drugas sa pagtuong dali kining makuha sa ka transaksyon. (With reports by Bombo Eric Amaro/GN/SBR)
