300 turista, balikbayan lauman sa Suroy Suroy Sugbo 2019

CEBU CITY — Moabot sa 300 ka mga partisipante ang target sa Cebu Provincial Capitol alang sa ipahigayong Suroy Suroy Sugbo 2019 karong Nobyembre.

Matud ni Governor Gwendolyn Garcia nga karon pa lang, daghan na ang mga turista ug balikbayan ang mosalmot sa maong pagpanuroy.

Ubos sa konsepto nga “Southern Heritage Trail,” ipasigarbo sa 10 ka mga lungsod sa habagatang bahin sa probinsya ang ilang mga nindot nga talan-awon.

Sugdan kini sa lungsod sa Minglanilla ug tapuson kini sa dakbayan sa Talisay.

Dugang pa ni Garcia nga anaa na sa katapusang bahin ang pagpangandam alang sa Suroy Suroy Sugbo.

Mipasalig ang gobernadora og mas nindot nga kasinatian alang sa mga turista itandi sa nang-aging mga katuigan.