CEBU CITY-Paghatag ug paglaum ug pagpahinumdom sa ‘self-worth’ ang tumong sa grupong ‘LoveYourself’.
Gibutyag ni Jan Estrada, ang head sa LoveYourself , Cebu atol sa Goodmorning Philippines Program sa Bombo Radyo nga gihatagan nila og pagtagad ang mga nagpositibo sa Human Immunodeficiency Virus (HIV) kung diin daghan niini ang mawagtangan na gayud og kumpyansa sa kaugalingon, ingun man nga adunay kabalaka sa ilahang panglawas.
Matud ni Estrada nga kung lantawun ang tawu nga walay HIV ug ang tawu nga HIV positive giingung wala kini kalahi-an hinungdan nga mamahimu man gihapon nga magpuyo nga normal ang mga nagpositibo.
Gipahibalo niini nga aduna sila’y center nga gitawag ug LoveYourself White House kung diin welcome ang tanan nga gusto nga magpa-HIV test ug giingung libre lang kini.
Dugang pa, kadtung mga nagpositibo sa HIV ang maka-avail usab kanila ug libre nga treatment kung diin aduna sila’y mga medical staff nga mu-cater usab niini.
Gawas sa kaso sa HIV, gi-asuy ni Estrada nga welcome usab sa ilahang center ang mga tawu nga adunay problema ug gustong adunay maka-isturya.Kini ang ilahang tubag usab sa nagkasaka nga kaso sa paghikog.
Mipahinumdom kini sa mga indibidwal nga adunay mga problema nga gihambin nga wala kini sila mag-inusara ug anaa ang LoveYourself nga andam maminaw kanila. (SBR)
