CEBU CITY — Hapsay ug malinawn ang assessment ni Cebu City Vice Mayor Mike Rama sa walo ka mga sam-ang nga iyang gibisita niadtong adlaw sa mga santos.
Nanghinaot si Rama nga magpadayon ang dagan sa pagkamalinawn sa mga nagkadaiyang sam-ang sa dakbayan.
Matod sa bise mayor nga adunay mga ginagmayng problema ang nasugatan susama sa mga nakuyapan gumikan sa kainit ug kadaghang tao, apan normal lamang kini.
Gawas niini, wala laing natala nga mga dakong insidente, base sa assessment sa Vice Mayor.
Walay mga gate usab ang mga gipangsirad-an sa mga sam-ang para sa paglikay sa stampede subay na sa pagdagsa sa mga tao.
Sa laing bahin, mihangyo si Rama sa publiko nga mag-ampo mag-andam sa kanunay subay na sunod-sunod nga linog nga mitay-og sa area sa Mindanao.
Gipasalamatan usab ni Konsehal Dave Tumulak ang mga katawhan ug kapulisan tungod sa kooperasyon alang sa pagpalungtad sa kalinaw sa mga sam-ang sa dakbayan.
Matud ni Tumulak, nga bisan sa kainit sa panahon padayon ang pag-abot sa mga tao paingon sa tagsa-tagsa ka mga lubnganan.
Nanghinaot ang Konsehal nga ma-sustiner usab karong adlawa ang kahapsay sa dagan sa panahon kagahapon.
Wala man usab hinuoy mga natala ang mga DSWS nga naka-standby sa matag sam-ang nga iyang nabisita nga adunay nawagtangan ug mga bata ingon man mga butang. (LQ)
