Gipakusgan sa Cebu City Police Office ang ilang intelligence monitoring batok sa crime against property samtang nagsugod na ang ber-months ug nagkaduol ang holiday season.
Kini isip preventive measure sa kapulisan batok sa posibleng pagsaka sa mga insidente sa pagpangawat, robbery, carnapping ug uban pang krimen batok sa kabtangan sa mga umaabot nga bulan.
Matud ni PLTCOL Franco Rudolf Z. Oriol ang Deputy City Director for Administration gimandoan na sa City Director ang intelligence unit sa pag-ila ug pagtultol sa mga personalidad ug lugar nga posibleng nalambigit sa mga kalihokan nga may kalabotan sa gikawat nga mga sakyanan ug motorcycle parts.
Lakip sa ilang tutokan ang pagmonitor kung asa posibleng gipamaligya ug kinsa ang mga namalit sa mga piyesa nga posibleng gikan sa gikawat nga mga motorsiklo.
Tumong niini nga sayo pa lang ma-identify ug ma-locate ang mga suspek aron mapugngan ang posibleng pagdaghan pa sa carnapping ug uban pang crime against property.
Si Oriol nagkanayon nga base sa rekord sa kapulisan sa mga miaging tuig, adunay nakita nga pattern sa pagsaka sa crime against property samtang nagkaduol ang Disyembre o holiday season.
Tungod niini, Gihatagan na og direktiba sa city director ang mga station commander nga magtuon ug magpatuman og tukmang intervention sa ilang tagsa-tagsa ka area of responsibility.
Gipakusgan usab sa kapulisan ang ilang monitoring sa mga personalidad nga kaniadto nang nalambigit sa mga kaso, ilabina ang mga giila nga repeat offenders.
