CEBU CITY — Gitataw sa mga kadete sa Philippine National Police Academy (PNPA) nga wala gitugot ang bisan unsang matang sa pagmaltrato sa sulod sa akademya.
Kini taliwa na sa maong isyu diin gipaubos sa imbestigasyon ang pipila ka mga kadete sa maong institusyon gumikan sa gituohang hazing.
Sa pagpakighinabi sa Bombo Radyo ngadto ni Cadet 1st class Jose Leander Velasquez, kini nagkanayon nga wala gi-tolerate sa PNPA ang bisan unsang matang sa pagmaltratar sama lang sa hazing.
Matud ni Velasquez nga kung masayud man sa mga nangulo ang maong insidente, mohatag sila og dinaliang aksyon alang sa pagsulbad niini.
Gitataw usab sa maong kadete nga adunay mga silot nga gitugot alang sa mga kadete nga nagpabadlong o nakahimo og mga kalapasan.
Kini sama lang sa mga authorized exercises diin isilsil sa alimpatakan sa mga kadete ang ilang kasaypanan aron sa ingon, makakat-on sila.
Samtang gidugang usab ni Cadet 1st Class Jec Seares nga strikto kaayo ang mga patakaran sulod sa akademya sama lang sa mga demerits alang sa mga kadete nga dili sinaw ang sapatos ug gubot ang uniporme.
Gipasabot ni Seares nga kung mapamatud-an sa mga nangulo ang hazing sa sulod, ma-dismiss usab kini sa academy.
Hinuon mitambag ang mga kadete sa mga ginikanan, kinsang mosulod ang ilang anak sa PNPA, nga dili gayud sila mabalaka gumikan kay ilang gikondenar ang bisan unsang pagmaltrato.
