CEBU CITY-Personal grudge ang gitan-aw karon nga motibo sa Negros PNP sa pag-ambush patay sa mag-amahang Brgy. Konsehal sa Sitio Napac-an, Brgy. Kalumbuyan, Bayawan City, Negros Oriental nga sila si Felipe Condez, 60 anyos, ug anak niini nga si Jonesis Condez, 31 anyos.
Gi-ambush ang duha sa may Brgy. Kalamtukan.
Gisaysay sa hepe sa Negros Oriental PNP nga si Police Colonel Julian Entoma nga gikan nangumpra sa Bayawan City ang mag-amahan ug padong na unta kini mupa-uli sa ilaha sa Brgy. Kalamtukan sa dihang gisundan kini sa duha ka mga suspek nga nag motor ug gipusil.
Naka-angkon og nagkadaiyang samad-pinusilan sa ilang lawas ang duha ka mga biktima nga miresulta sa ilang hinanaling kamatayon. Dugang pa ni Entoma nga basi sa ilang nakuha nga impormasyon, nagsakay ug XRM nga motor ang duha ka suspek nga walay plate number.
Duha ka armas matud pa ang gigamit niini nga adunay mga kabhanga sa bala sa Armalite M-16 ug cal. 45 nga nakuha sa crime scene. Usa sa gitan-aw nga person of interest karon ang igsoon ra usab sa biktima nga si Felipe Condez. Nasayran nga duna silay panagbangi sa isig ka pamilya.
Sa pagkakaron, padayon pa gihapon nga giila ang responsable sa maong krimen gumikan kay nagtaptap usab kini sa ilang mga dagway. (Lahvi Quiñones)
