CEBU CITY-Gipasabot ni Land Transporation Office (LTO-7) Regional Director Victor Caindec ang kasaulogan o paghandum sa World Day of Remembrance for Road Traffic Victims kung diin duna silay gimontar nga lungon og mga motor sa karsada gawas sa ilang buhatan.
Matud ni Caindec sa pakighinabi sa Bombo Radyo Cebu nga kini isip pagpahinumdom sa publiko sa disgrasya sa kadalanan.Wala kini matud pa pili–mapobre ka man o madatu hayan kinahanglan mag-aampingon gyud sa pagdrive.
Kini subay na usab sa nagkasaka nga ihap sa disgrasya sa dalan kung diin milihok na ang United Nations (UN) ug Department of Transportations (DoTr) nga magkolekta na og data sa ihap sa mga road accidents. Mukuyog na usab ang LTO sa pagkuha niining maong data ug ila pang hingusgan ang kampanya.
Gani, gipasabot sa LTO ang kahulugan sa ilang tema nga “road safety, the smart way home” kung diin ang lungon matud pa ang nagsimbolo nga kung dili mag-amping sa pagdrive masulod sa lungon ug mamatay.
Duna usab sila gidisplay nga mga motor nga matud pa gipanag-iya sa mga nadisgrasya ug nangamatay.
Gidugang pa usab ni Caindec nga kung dili man gali mamatay ang madisgrasya tungod sa kadanghag, mahimo usab kining inotel, nga mas lisod pa itandi sa mamatay gumikan kay ang pamilya man ang magbagood sa gastos.
