CEBU CITY — Patay ang usa ka ulit-tawo human nga nalumos sa usa ka dakong sapa kagabii sa Sitio Tambongol, Barangay Kalunasan, sa dakbayan sa Sugbo.
Giila ang biktima nga si Christian Benlota, 18 anyos, ug residente sa Brgy. Guadalupe sa susamang dakbayan.
Matud sa head sa Cebu City Disaster Risk Reduction and Management Office nga si Harold Alcontin nga nangaligo si Benlota kauban ang tulo niya ka mga amigo sa sapa.
Sa dihang misaka ang lebel sa tubig sa maong sapa, moundang unta silang upat apan nagpadayon ang biktima sa pagpangaligo hinungdan nga naanod kini.
Dugang pa ni Alcontin nga pagkalabay sa pipila ka oras, nakit-an sa mga residente ang lawas ni Benlota nga wala nay kinabuhi apan nataud-tauran lang kini sa pagreport ngadto sa hingtungdan.
Miresponde dayon ang ambulansya sa Brgy. Guadalupe ug gisuway og recover sa medical staff ang biktima apan nakabsan kini sa kinabuhi.
Luwas usab ang mga kauban sa biktima nga silang Dennis Dichoso, Robert Mahilum, ug Hezekiah Asher Celestial.
Mitambag si Alcontin sa publiko nga likayan una ang pagpangaligo sa mga sapa sa panahon nga mosaka ang lebel sa tubig ilabi na kung kusog ang pagbundak sa uwan.
Samtang gi-awhag usab sa Cebu City DRRMO head nga magpabiling alerto sa kanunay aron marespondehan dayon kung adunay maanod sa sapa.
