Gitangtang sa Cebu South Bus Terminal ang mga food stalls sa sulod aron maka-accommodate sa mas daghang mga pasahero ilabi na kadtong mga mobakasyon ning holiday break.
Kini ang gibutyag ni CSBT Operations Manager Carmen Quijano subay na sa pagdagsa sa mga pasahero sa terminal.
Matud ni Quijano nga sukad sa nakalabay nga weekend, moabot na sa 50,000 ka mga pasahero ang magdasok sa terminal paingon sa ilang tagsa-tagsa ka mga destinasyon.
Lauman usab nga mas modaghan kini inig abot na sa bisperas sa Pasko.
Dugang pa niini nga kinahanglang makalingkod ang mga pasahero hinungdan nga ilang gitangtang ang mga food stalls.
Mipahinumdom si Quijano sa mga mobyahe karong Holiday break nga magdala lang og gamay nga bagahe alang sa mas hapsay nga seguridad ingon man mas haruhay nga pagbyahe.
Sa gihapon, gipatuman ang “no ticket, no entry” policy sa sulod sa terminal.
