Balik na sa normal operating condition ang power grid sa Visayas kagahapon, Biyernes Septiyembre 18, 2026, samtang wala na usab nakasinati og rotational brownout ang mga konsumante sa Sugbo sulod sa milabay duha ka adlaw.
Base sa pinakabag-ong Grid Alert Status alas 7:30 sa buntag, ang tanang power grids sa nasud anaa sa NORMAL operating condition, base sa kasamtangang power supply ug demand forecast.
Sa Visayas Grid, misaka ang available generation capacity tungod sa pagbalik sa operasyon sa TSI 1 ug GNPK 2 sa Mindanao. Tungod niini, napuno na usab ang 450 megawatts (MW) nga mahimong ma-export gikan sa Mindanao paingon sa Visayas pinaagi sa Mindanao-Visayas Interconnection Project (MVIP).
Sa Visayas, mokabat sa 2,672 MW ang available capacity, samtang ang peak demand gibanabana sa 2,308 MW, o adunay kapin 364 MW nga reserve margin.
Bisan pa niini, nagpasidaan ang grid operator nga usa ka major plant outage mahimong hinungdan sa pagpatuman pag-usab og Yellow Alert sa Visayas Grid.
Sa pagkakaron, ang pagbalik sa normal nga grid condition naghatag og kahupayan sa mga power consumers, ilabina sa Sugbo nga nakaagi sa rotational brownout atol sa miaging mga adlaw.
