CENTRAL VISAYAS- Nagpagawas ang National Grid Corporation of the Philippines (NGCP) og Yellow ug Red Alert alang sa Visayas Grid karong adlawa, Agosto 28, 2026.
Gipailalom sa Yellow Alert ang grid gikan alas-2 sa hapon hangtod alas-5 sa hapon, ug gikan alas-8 sa gabii hangtod alas-9 sa gabii.
Samtang, gipailalom kini sa Red Alert gikan alas-5 sa hapon hangtod alas-8 sa gabii.
Matud sa NGCP, nakatampo sa pagdeklara sa Yellow ug Red Alert ang padayong pagkawala sa kapasidad sa mga planta sa TVI 1, TVI 2, ug KSPC 1, lakip na ang limitado nga pag-import og kuryente gikan sa Mindanao Grid.
Mokabat sa 979.6 megawatts (MW) ang kapasidad nga dili magamit sa grid tungod sa forced outage sa 30 ka power plants ug pagkunhod sa operating capacity sa 16 ka planta.
Kini na ang ika-25 nga adlaw sukad Agosto 3 nga nag-isyu ang NGCP og grid alert alang sa Visayas Grid.
Giklaro sa NGCP nga ang Red Alert ideklarar kung molapas ang panginahanglan sa kuryente sa anaa nga suplay, samtang ang Yellow Alert ipatuman kung dili igo ang operating margin aron matubag ang gikinahanglang contingency sa transmission grid.
