Anaa sa luwas nga kahimtang ang 13 ka mga pasahero nga sakay sa motorbanca human kini napagngan ug makina sa tunga-tunga sa kadagatan sa Sugbo.
Gibutyag ni Lt. Junior Grade Michael John Encina ang tigpamaba sa Philippine Coast Guard (PCG) 7 nga daling nagpahigayon ug search and rescue operation ang Coast Guard-Danao Station human sila nakadawat ug tawag sa maong panghitabo.
Giila ang maong motor banca nga J and J Liner nga usa ka colurom.
Nasayran nga gikan sa Olanggo Island ang maong motor banca ug paingon unta sa Camotes Island para mamalay.
Apan wala kini makaabot sa maong isla gumikan sa nahitabong aberya.
Matod pa ni Encina gumikan sa kakusog nga balod kagahapong adlawa, nagpatabang sila ug tugboat sa pag-rescue sa mga sakay sa motor banca.
Nakit-an ang motor banca nga sakay pa ang 13 ka mga pasahero samtang naglutaw-lutaw tunga-tunga sa kadagatan nga nasakop pa sa lungod sa Liloan.
Dugang pa ni Encina nga wala gitugutan ang J and J Liners nga mobyahe gikan sa Olanggo Island paingon sa Camotes Island.
Atol sa adjudication, pagahisgotan ang sanction sa maong motor banca ingon man ang multa niini.
