Gipaabot pa karon sa Land Transportation Franchising and Regulatory Board (LTFRB) 7 ang memorandum gikan sa Central Office kabahin sa pag-kanselar sa franchise sa Angkas ug pagpanakop sa mga habal-habal.
Matud ni LTFRB 7 Regional Director, Eduardo Montealto nga na expire na ang prangkisa niini niadtong Disyembre 31, 2019 ug mo extend unta kini hangtod sa Marso.
Apan sigon pa ni Montealto nga aduna kiniy rekomendasyon gikan sa technical group ug mo reklamo man gayud ang maong motor taxi hinungdan sa pagkanselar niini.
Usa usab sa ilang gitan-aw sa pagkanselar niini ang seguridad sa mga mga katawhan o riding public.
Dili man sila matod pa malipay nga aduna silay madakpan apan ang seguridad ilang gitan-aw kung diin maminusan na ang disgrasya sa kadalanan.
‘Dili maayo’
Wala mauyon si Cebu City Councilor Jun Alcover sa memorandum nga dakopon na sa sunod semana ang Angkas ingon man mga habal-habal nga mamasahero.
Hinuon matod pa ni Alcover wala pa siya nakadawat ug ‘official statement’ gikan sa LTFRB hinungdan nga wala pa gayud siya mahibaw kun unsay tinuod nga sulod sa memorandum nga pagahimuon niini.
Sigon pa ni Alcover nga kun hisgutan ang problema sa habal-habal, ang gobyerno wala gayud ga huna-huna ug solusyon niini.
Inay ang gibuhat sa gobyerno ang pagpang-gukod sa mga kabus nga nangita ug tarong nga panginabuhian.
Dugang pa sa Konsehal nga para niya dili man kini mao ang solusyon sa maong problema.
Gani angayan unta kini sila tabangan ug dili pangdakopon.
Susama sa pagbuhat niini nila ug cooperative nga adunay mga ‘guidelines’ gumikan gihimo naman kini ug panginabuhian sa mga kabus. (Lahvi Quiñones)
