Inay nga magbugno sa kama alang sa lawasnong kalipay, samad-samad sa nawong ug li-og ang naangkon sa usa ka “Adan” human nga gibugno sa usa ka “Eva” kinsang usa ka sex worker.
Gisaysay ni “Adan” sa dihang nahinabi sa Bombo News Team, nga samtang gilagbas niini ang dalan Manalili, dakbayan sa Sugbo, kaganihang alas 5 sa buntag, nadala kini sa “sales talk” sa usa ka bugaw.
Matud pa nga pag-abot niini sa kwarto, anaa na si Eva nga nagpaabot ug giingong gipangayu-an siya ug P500 ug sa dihang nahubo na niini ang iyahang sapot, nangayo na usab si Eva ug “additional tip” nga P1000.
Gumikan sa dakong “tip” nga gipangayo, mi-atras si Adan ug gusto na lang niini nga makuha ang unang gibayad nga P500, apan inay nga ihatag pagbalik ang kwarta, gibugno na hinuon kini ni Eva.
Subay niini, daling nagpakitabang si Adan sa kapulisan sa Waterfront Police Station.
Nasayran nga gawas sa P500, mihatag usab si Adan ug P300 sa bugaw, laing P500 alang sa bayad sa lodge, ingon man P100 alang sa pagpalit ug condom.
Sa pagkakarun, napaslak na sa prisohan si Eva samtang gikatakdang ipasaka ang kasong Physical Injury sa adlaw nga Lunes.
