Mipadayag ang Land Transportation Office (LTO)-7 nga boluntaryong mosurender sa otoridad ang lalaki sa viral video kinsang giingong migamit og wangwang aron dili ma-late sa pag-eskwela.
Matud ni LTO-7 Director Victor Caindec nga andam nga mopaubos sa imbestigasyon ang maong lalaki human nila makuha ang impormasyon kalabot niini.
Gihimug-atan usab ni Caindec nga dili kini interesado sa nag-upload sa maong video sanglit ilang imbestigaran ang maong driver gumikan sa dili otorisadong paggamit og wangwang.
Kahinumdumang naputos usab sa pagsaway ang nag-upload sa video nga giilang si Jasmine King Chan, human mipadayag nga, matud pa, nagdali ang maong lalaki aron dili ma-late sa examination.
Una nang mipadayag si Caindec, atol sa pagpakighinabi sa Bombo Radyo Cebu, nga silotan ang driver gumikan sa ilegal nga pagtaod og blinker, reckless driving, ug wala pagsul-ob sa iyang seatbelt.
Samtang gikondenar ni Lapu-Lapu City Mayor Junard “Ahong” Chan ang binuhatan sa maong driver.
Matud sa statement sa mayor nga dili niya i-tolerate ang maong matang sa abuso, kaila man o kabanay sa pamilya.
