Gihulagway sa usa ka manlalaban nga ‘kataw-anan’ ang nahitabo karon nga pagduso ni SolGen Jose Calida og quo warranto petition aron nga mawad-an og bisa ang prangkisa ang usa ka giant network nga mao ang ABS-CBN.
Matud ni Atty. Clarence Paul Oaminal nga ang dunay gahom aron makakuha og prangkisa ilabina ang media outlet mao ang kongreso.
Kini nakalatid sa balaud, nga dili ang presidente ug dili ang laing buhatan ang maoy makahatag niini og prangkisa sanglit ang kongreso man ang labing taas balay balauranan sa nasud ug maoy makaproteher sa batakang balaud.
Hayan ang dunay katungod nga murevoke sa prangkisa sa maong media outlet mao ang kongreso ug dili ang laing tao bisan paman og presidente.
Kini human usab nga nalink ang giingong pagtira sa ABS CBN ngadto ni Presidente Rodrigo Duterte ug ang wala pag-air sa iyang election campaign.
Pag-asoy sa manlalaban nga mao kini karon ang gi-atangan kun unsaon kini paghusay sa korte suprema.
Gipasabot usab ni Oaminal nga ang qou warranto mao ang proseso ubos sa proceedings nga ang gobyerno ug dili laing tao ang mupasaka og reklamo sa legal court kung gikwestyon niini ang pagkupot sa katungdanan o rango sa usa ka sakop sa gobyerno sama sa nahitabo ni kanhi Chief Justice Sereno ug ingon man ang pagkwestyon sa paghatag og prangkisa sa usa ka media outlet nga nahitabo karon sa ABS CBN.
Samtang ang papel usab sa Solgen,mao kini ang matud pa ang abogado sa estado, ug kini ang abogado sa presidente. (fdp)
