Determinasyon ug lig-on nga diskarte ang sikreto sa usa ka Sugbuanong motorcycle rider maong nakadaug kini sa usa ka 1,000-kilometer endurance challenge sa Ormoc City, Leyte.
Kini human nga nahimong kampeon ang pambato sa Sugbo nga si Mark Anthony Boyo atol sa Ormoc Endurance Challenge niadtong Pebrero 15 sa nahisgutang lugar.
Sa pagpakighinabi sa Bombo Radyo ngadto ni Boyo, gi-angkon niini nga dako ang iyang bentahe sa maong kompetisyon gumikan sa kakusog sa volume (o CC) sa iyang motor.
Atol sa kompetisyon, naglisud si Boyo sa pagsubay sa iyang ruta gumikan kay wala kini katultol sa lugar.
Bisan pa man sa iyang nasinating kahasol, nangharos gihapon kini sa kompetisyon pinaagi sa record nga 9 hours ug 51 minutes.
Ang sikreto lang sa Sugbuanong rider aron makalampus sa taas nga byahe mao ang pag-ampo ug ehersisyo.
Dugang pa ni Boyo nga gihimo niyang kalingawan ang pagbyahe sa iyang motor sa taas nga distansya gumikan kay stress reliever niya kini.
Alang sa mga gustong makalampus sa maong sport, mitambag si Boyo nga kinahanglan, dili magki-at kung mag-drive, dili mag-inom, ug mag-ampo sa Ginoo.
