Plano karon sa Japan nga ipaubos sa clinical trials ang mga tambal sa HIV o human immunodeficiency virus aron himoong tambal sa coronavirus disease (COVID-19).
Kini subay na sa nagkasaka nga ihap sa mga nataptan niini diin apektado usab ang ekonomiya sa maong nasud.
Nagkanayon ang tigpamaba sa Japanese government nga si Yoshihide Suga nga gipangandaman nila ang mga clinical trials gamit ang nahisgutang mga medisina sa labing daling panahon.
Apan sa pagkakaron, wala una mitingog si Suga kung kanus-a ba makahimo og tambal nga aprubado aron matambalan ang COVID-19.
Samtang namakwit na ang 300 ka mga Amerikano kinsang mga pasahero sa Diamond Princess cruise ship nga ni-angkla sa Japan.
Kini human nga mipadala og evacuation team ang US Government alang sa pag-rescue sa nahisgutang mga pasahero.
Plano usab sa mga foreign governments, lakip na ang Canada, Australia, Italy, South Korea, ug Pilipinas alang sa pag-evacuate sa mga pasahero sa barkong na-lockdown tungod sa coronavirus disease. (Reuters)
