Anaa sa luwas nga kahimtang ang gatusan ka mga pasahero sa usa ka roll-on-roll-off vessel human kini gi-rescue sa mga sakop sa Philippine Coast Guard (PCG)-7 sa kadagatan sa Camotes Island, Cebu.
Matud sa tigpamaba sa PCG-7 nga si Lieutenant Junior Grade Eric Salcedo nga napagngan og makina ang barkong MV Mika Mari III sa dihang nibyahe kini kagahapon sa hapon gikan sa Danao City Port.
Hinungdan nga miresponde dayon ang mga sakop sa Coast Guard human nakadawat og distress signal.
Luwas hinuon nga nidunggo ang RORO vessel sa Consuelo Port kagabii ug luwas usab ang 133 ka mga pasahero ug 17 ka mga crew members niini.
Base sa inisyal nga imbestigasyon, adunay malfunction ang cooling system sa barko maong napagngan ang makina niini.
Gikatakdang moduso og marine protest ang nahisgutang vessel ngadto sa PCG-7.
