CEBU CITY — Nihangyo si Pope Francis nga maghiusa ang tanang kanasuran ug ipadaplin ang tanang panaglalis subay sa nasinating grabeng epekto sa COVID-19 pandemic.
Atol sa Easter message niini sa hawan kaayo nga St. Peter’s Basilica sa Vatican City, nagkanayon ang Santo Papa nga wagtangon una ang tanang panaglalis tungod kay nag-antus ang kalibutan sa makamatay nga kagaw.
Mipahimangno usab si Papa Francisco sa mga kanasuran sa Europe nga makita gayud sa kalibutan ang dakong epekto sa pandemic kung wala gayud magkasinabot.
Hangyo usab niini sa tibuok kalibutan nga “ceasefire” una sa tanang mga kagubot ug tabangan ang tanang mga apektado sa maong global pandemic.
Mipadangat usab ang Santo Papa og simpatiya sa tanang mga namatayan sa maong sakit kinsang wala makahigayon og panamilit tungod sa gipatumang mga protocols.
