CEBU CITY — Napaglantawan ni Cebu Provincial Governor Gwendolyn Garcia nga makapahigayon sa ilang targeted mass testing sa coronavirus disease o COVID-19 sa sunod semana.
Kini human nga naninguha ang gobernadora nga makapalit og 50,000 ka rapid test kits sa Abril 23 nga gamiton alang sa massive testing.
Mitanyag ang ikaduhang supplier sa rapid test kits og P600 nga kantidad sa matag kits diin mas ubos kini og katunga itandi sa unang supplier sa test kits.
Kung mahinayon man ang pagpalit sa maong kit karong semanaha, magamit kini sa probinsya sa sunod semana.
Dugang pa ni Garcia nga nakig-alayon kini sa mga eksperto gikan sa University of the Philippines (UP) alang sa pagpangita og target test subjects gikan sa 44 ka mga kalungsuran ug syudad sa probinsya.
Una nang niingon ang gobernadora nga ang massive testing maoy basehan alang sa posibleng pagpatuman sa modified enhanced community quarantine sa Sugbo.
